काठमाडौँ – नेपाली काँग्रेसका सभापति तथा प्रधानमन्त्री शेरबहादुर देउवा र वरिष्ठ नेता रामचन्द्र पौडेलबीच गठबन्धन अघि बढाउने र पार्टीका भ्रातृ संगठनको पूर्णताको विषयलाई लिएर दोहोरी चलेको छ । मंगलबार नेपाल विद्यार्थी संघको स्थापाना दिवसका अवसरमा आयोजित कार्यक्रममा देउवा र पौडेलबीच दोहोरी चलेको हो । केही समय घम्साघम्सी नै परेको थियो ।
प्रधानमन्त्री देउवाभन्दा अगाडि बोलेको पौडेलले गठबन्धन देउवालाई प्रधानमन्त्री बनाउन नभई संविधान र व्यवस्था जोगाउन बनाएको बताएका थिए । साथै उनले नेविसंघको कार्यसमिति अपुर्ण रहेको भन्दै तत्काल पूर्णता दिनुपर्ने बताएका थिए । त्यसको जवाफमा प्रधानमन्त्री देउवाले नेविसंघको छिटो अधिवेशन गरेर नेतृत्व हस्तान्तरण गर्नुपर्ने बताए । स्थानीय तह, प्रदेश र संघको निर्वाचन पछि गाउँ गाउँमा संगठन विस्तार गरी नेविसंघको अधिवेशन गराउन देउवाले निर्देशन दिए । ‘दुजाङको काम भनेको अधिवेशन गराउने हो । जो जित्छ उसैलाई नेतृत्व हस्तान्तरण गर्ने हो । भागबण्डा गर्दा झगडा मात्र हुन्छ यहाँ । भागबण्डाको रोग छ ,’ देउवाको भनाइ छ ।
पदाधिकारी बनाउँदा भागबण्डाको झगडा हुने उनको भनाइ थियो । ‘रामचन्द्रजीले पदाधिकारी बनाउने भन्नुभयो,’ उनले भने, ‘फेरि भागबण्डा गरी झगडा गरे हुन्छ । मेरो उपसभापति चाहियो, मेरो महामन्त्री चाहियो, मेरो उचाहियो, उ चाहियो त्यसैमा लडाइ हुन्छ ।’