नेपाली काँग्रेसका महामन्त्री गगन थापाले ‘नेतृत्व विहीन’ पाँच भ्रातृ संस्थामा नयाँ कमिटी ल्याउनुको विकल्प नभएको बताएका छन् । काँग्रेसमा भ्रातृ संस्थाहरु महिला संघ, दलित संघ, तरुण दल नेविसंघ र मुस्लिम संघमा नयाँ कमिटी ल्याइने थापाले बताएका हुन् ।
थापाका अनुसार ६ महिनाभित्र महाधिवेशन गर्ने गरी नेतृत्वका आएका राजीव ढुंगाना दुई वर्षपछि अधिवेशन नगरेर बाहिरिने अवस्था आएको छ । ढुंगाना नेतृत्वमा ११० सदस्यीय कमिटी बनाउने भनिए पनि १० पदाधिकारीमा कमिटी भंग हुने सम्भावना बढेको छ ।
प्रत्येक दुई–दुई वर्षमा अधिवेशन हुने व्यवस्था भए पनि ०७३ भदौपछि नेविसंघमा महाधिवेशन हुन सकेको छैन । यस्तै तरुण दलमा पनि नयाँ कमिटी ल्याएको अवस्थामा जीतजंग बस्नेत नेतृत्वको कमिटी भंग हुने छ । २०७३ मङ्सिरमा तरुण दलको अध्यक्ष बने बस्नेत पाँचसम्म कमिटीलाई पूर्णता बाहिरिने अवस्था बनेको छ । ९५ सदस्यीय कार्यसमितिमा चार जना पदाधिकारीमै पाँच वर्ष बितिसक्यो । तीन वर्षे कार्यकालमा बस्नेत नेतृत्वको कार्यसमितिले थप दुई वर्ष बिताइसक्दा पनि तरुण दलले अधिवेशन गर्न असफल रह्यो ।
यस्तै ०७३ असोजमा भएको महाधिवेशन महिला संघमा नयाँ नेतृत्वको खोजी भएको छ । महिला बालबालिका मन्त्री र पार्टीको केन्द्रीय सदस्य भइसक्दा पनि रेग्मीले महिला संघको जिम्मेवारी छोडेकी छैनन् । अध्यक्ष, उपाध्यक्ष, महासचिव र कोषाध्यक्ष पार्टीको केन्द्रीय सदस्य भएपछि महिला संघमा नयाँ कमिटी ल्याउनुपर्ने बाध्यता छ ।
नयाँ कमिटी आए नेपाल दलित संघमा मीन विश्वकर्मा एक दशकको राज सकिने छ । तीन वर्षे कार्यकाल रहेको संघको चौथो महाधिवेशन २०६९ सालमा सम्पन्न भएका १० वर्ष भइसकेको छ । योबीचमा विश्वकर्मा तीनपटक केन्द्रीय सदस्य भइसके । तर, उनले महाधिवेशन नगरेर कार्यकाल लम्ब्याउँदै दशक बिताएका छन् ।
२०७५ साल वैशाखमा दोस्रो महाधिवेशनबाट मुस्लिम संघको नेतृत्वमा आएका सत्तार पार्टी केन्द्रीय सदस्य भएपछि त्यहाँ पनि नयाँ कमिटीको खोजी भएको छ ।
बाँकी भ्रातृ तथा शुभेच्छुकको के हुन्छ ?
वर्षौँसम्म अधिवेशन नगराउने बाँकी भ्रातृ र शुभेच्छुक संस्थामा पनि नयाँ कमिटी ल्याउने कि भन्ने विषयमा छलफल भइरहेको महामन्त्री थापाले बताए । ‘पाँचवटा बाहेक बाँकी भ्रातृ तथा शुभेच्छुक संस्थाहरूको पनि वर्षौँदेखि अधिवेशन भएको छैन । खाली म्याद थपेको छ, बसेको छ । यसको बारेमा पनि हामी छलफलमा छौँ,’ उनले भने ।
फेरि म्याद थपिदिँदा पनि महाधिवेशन गर्ने आधार नरहेको उनको भनाइ छ । ‘यत्रो वर्ष अधिवेशन नगरेको मान्छेले अहिले केको आधारमा गर्छ ?,’ थापाको प्रश्न छ, ‘त्यसैले यिनीहरूको बारेमा पनि के गर्ने भनेर खाका बनाउनुपर्ने भएको छ ।’
२०६४ सालमा गठन भएको किसान संघले अहिलेसम्म अधिवेशन गर्न सकेको छैन । यस्तै नेपाल प्रजातन्त्र सेनानी संघले पनि २०६९ सालपछि अधिवेशन गरेकै छैन । २०७३ साल केन्द्रीय अधिवेशन गरेको नेपाल भूतपूर्व सैनिक संघ र २०६४ सालदेखि नेपाल आदिवासी जनजाति संघको पनि अधिवेशन भएको छैन । अध्यक्ष इन्द्रबहादुर गुरुङले केही दिनअघि राजीनामा बुझाएका छन् । यस्तै २०६६ सालमा गठन भएको राष्ट्रिय लोकतान्त्रिक अपाङ्ग संघले एकपटक पनि अधिवेशन गरेको छैन । नेपाल तामाङ संघको अध्यक्षमा १२ वर्षदेखि केवलबहादुर तामाङ रहेका छन् भने नेपाल राष्ट्रिय मगर संघको पनि नियमित अधिवेशन भएको छैन ।
२०७५ साल वैशाखमा दोस्रो महाधिवेशन गरेको नेपाल मुस्लिम संघमा पनि महाधिवेशनको सुरसार छैन । नेपाल ठाकुर समाजले २०६७ साल वैशाखदेखि महाधिवेशन गरेको छैन । ठाकुर समाज ११ वर्षदेखि पुरानै नेतृत्वबाट सञ्चालित छ ।
काँग्रेसका १८ शुभेच्छुक संस्थाहरूमध्ये अधिकांश नियमित अधिवेशन हुन सकेको छैन । नेपाल प्रेस युनियन, नेपाल प्रजातन्त्रवादी प्राध्यापक संघ, नेपाल सांस्कृतिक संघ, नेपाल गैरसरकारी लोकतान्त्रिक संस्था महासंघ र नेपाल लोकतान्त्रिक शेर्पा संघले अधिवेशन भएको छैन ।
यस्तै नेपाल कुमाल संघलगायत धेरैको नियमित कार्यकाल सकिएको वर्षौं हुँदासम्म पनि अधिवेशन हुन सकेको छैन । सांस्कृतिक संघ पाँच वर्षदेखि चारजना पदाधिकारीमा सीमित छ । सांस्कृतिक संघले पनि बारम्बार म्याद थप्दा पनि अधिवेशन गर्न सकेको छैन ।