गायिका एलिना चौहान पछिल्लो समय आफ्नो प्रेम जीवनका कारण पनि थप चर्चामा छिन् । अस्ट्रेलियामा बसोवास गर्दै गाएका विष्णु सापकोटासँग उनले टिकटकमा राख्ने भिडियोले उनीहरू प्रेममा रहेको चर्चा चलेको थियो ।अस्ट्रेलियाको साङ्गीतिक भ्रमण सकेर केही दिनअघि मात्रै फर्किएकी एलिनाले त्यहाँ रहँदा विष्णुसँग लगातार टिकटक भिडियोहरू पोष्ट गर्ने गरेकी थिइन् ।
अब भने एलिना आफ्नो प्रेम जीवन गुपचुप राख्ने मनस्थितिमा नरहेको देखिन्छ ।
उनले इष्टाग्राममा विष्णुसँगको तस्वीर राख्दै प्रेमिल शब्दहरु कोरेकी छिन् । उनले लेखेकी छिन्, –‘तिमीलाई सोचेर मेरा विपनाहरु बित्छन् । तिम्रो सपना देखेर मेरो निद्रा पूरा हुन्छ । तिमीसँग हुँदा म जिउँदो अनुभव गर्छु ।’ एलिनाको उक्त पोष्टमा धेरैले बधाई दिएका छन् ।
राष्ट्रिय लोक तथा दोहोरीगीत प्रतिष्ठानको अस्ट्रेलिया शाखाका अध्यक्षसमेत रहेका विष्णु कार्यक्रम आयोजक समेत हुन् । उनले केही गीतहरूमा स्वर समेत दिएका छन् । गीत लेख्ने समेत गर्दै आएका विष्णुले एलिनासँग ‘बाजा तालमा’बोलको गीतमा स्वर दिएका छन् । एलिना अस्ट्रेलिया जाँदा उनीहरूको सम्बन्ध थप झाङ्गिएको हो ।
निकटस्थका अनुसार एलिना र विष्णुको सम्बन्धबारे दुवैको परिवारलाई जानकारी छ । र, दुवैको परिवारमा विहेबारे कुरा समेत चलिरहेको बुझिएको छ । त्यसैले पनि एलिनाले आफ्नो प्रेम जीवनलाई खुलाउन थालेको बुझन् सकिन्छ ।