काठमाडौं, १५ मंसिर । नेपाली कांग्रेसका वरिष्ठ नेता एवं तनहुँ-१ का नवनिर्वाचित सांसद रामचन्द्र पौडेलले पहिलो पार्टी भएको श्रेय पार्टी सभापति एवं प्रधानमन्त्री शेरबहादुर देउवालाई नै दिनुपर्ने औंल्याएका छन् । संसदमा पहिलो पार्टी भएको श्रेय लिने दौडमा म छैन । शेरबहादुरजी पार्टी सभापति हो । पार्टीलाई पहिलो बनाएको श्रेय उहाँले नै लिनुहुन्छ । त्यसमा मेरो पनि सहयोग छ, प्राइम टाइम्स टेलिभिजनको ‘जनता जान्न चाहन्छन्’ कार्यक्रमका लागि पत्रकार ऋषि धमलासँग कुरा गर्दै पौडेलले भने ।
यसपटक देउवाले आफूलाई सहयोग गर्नेमा आशावादी रहेको पनि उनले बताए । पौडेलले भने, ‘शेरबहादुर देउवा पार्टी सभापति हो । केन्द्रीय समितिमा उहाँसँग बहुमत छ । उहासँग शक्ति छैन म भन्दिनँ । तर अरुलाई प्रधानमन्त्री बनाउने कि नबनाउने भन्ने उहाँको विवेकमा भर पर्छ । अब हामीले देश र पार्टीको आवश्यकता र जनताको मुड पनि हेर्नुपर्यो । देशभरि बजेको घण्टीको आवाज पनि सुन्नुपर्यो । तर मलाई शेरबहादुरजीको सहयोग नमिल्ला भन्ने लाग्दैन । पार्टीभित्र न्याय पनि हुनपर्यो नि । उहाँ त पटक पटक प्रधानमन्त्री भइरहनुभएको छ । यसपालि मैले पाउनुपर्छ ।’
देउवाले तपाईंलाई राष्ट्रपति बनाएर आफू प्रधानमन्त्री हुनुभयो नि भन्ने पत्रकार धमलाको प्रश्नमा पौडेलले भने, ‘अहिले राष्ट्रपतिको कुनै प्रसंग छैन, कार्यकारी को हुँदा उचित हुन्छ भन्ने प्रसंग छ । बिना जिम्मेवारीको मानिसले केही गर्न सक्दैन । यसपटक प्रधानमन्त्रीका लागि सशक्त दाबी गरेको छु ।’
यसबारे प्रचण्ड र माधवकुमार नेपालसँग पनि कुराकानी गरेको उनले बताए । पौडेलले थपे, ‘उहाँहरु दुवै नेतासँग मेरो कुरा भएको छ । उहाँहरुलाई मेरो नाममा आपत्ति हुन्न । मुख्य कुरा त हाम्रै पार्टीमा समझदारी हुनुपर्यो । पार्टीमा त्यो वातावरण बनिसकेको छैन ।’
पार्टी महामन्त्री विश्वप्रकाश शर्माले अर्का महामन्त्री गगन थापालाई संसदीय दलको नेता प्रस्ताव गरिसक्नुभएको छ नि भन्ने पत्रकार धमलाको प्रश्नमा उनले भने, ‘कांग्रेस धेरै पुरानो अनुभव र योगदान भएका साथीहरु हुनुहुन्छ । गगन र विश्व युवा हुनुहुन्छ । उहाँहरुको दाबीलाई पनि म स्वाभाविक मान्छु । गगनसँग मेरो कुनै गुनासो छैन । युवाको दाबीलाई नसहने, विरोध गर्ने कुरै छैन । हामीले पनि किसुनजी, गणेशमान र गिरिजाबाबुलाई चुनाव नलड भनेर कागज गराएकै हो । राष्ट्र निर्माणमा युवाको भूमिका जरुरी छ । म त्यसको स्वागत गर्छु । तर वार्धक्य निन्दा गरेर पार्टी चल्छ ? निषेधको राजनीति गर्न मिल्छ ? के बलिदान र योगदानको कदर नहुने ? त्याग, तपस्या र संघर्षको कुनै मूल्य छैन ? देशलाई निकास दिने अनुभवको कुनै मूल्य छैन ?’
चौधौं महाधिवेशनमा देउवा र तपाईंबीच केही गोप्य सहमति भएको थियो भन्ने पत्रकार धमलाको प्रश्नमा पौडेलले भने, ‘त्यस्तो केही सहमति भएको होइन । म निसर्त अलग बसेको हुुँ । मीनेन्द्रजी, शेखरजी, महेशजीले जोगिएर बस्नुस् भन्नुभयो । म नलड्दा मात्र प्रकारान्तरले देउवालाई सहयोग पुगेको हुन सक्छ । तर मैले शेरबहादुर या शेखरलाई भोट हाल भनिनँ । मैले भोट पनि हालिनँ ।’
महाधिवेशनका बेला मुलुकलाई तपाईंको आवश्यकता छ किन भन्नुभयो त भन्ने अर्को प्रश्नमा पौडेलले भने, ‘हो, शेरबहादुरजीले तपाईं स्वास्थ्य राम्रो राख्नुस्, मुलुकलाई तपाईंको आवश्यकता छ भन्नुभएको थियो । मैले तयतिबेला त्यसको परिभाषा खोजिनँ । अहिले आएर त्यसको अर्थ म बुझ्दैछु । उहाँको मुखमा सरस्वती कसरी फुरिन् ? पार्टीमा म सबैभन्दा वरिष्ठ, अवसर नपाएको र परीक्षण नभएको नेता हुँ । म कार्यकारी बन्नु न्यायोचित नै हुन्छ ।’
त्यसो अब पार्टीमा एक व्यक्ति एक पद लागू होला भन्ने प्रश्नमा पौडेलले भने, धेरै वर्षदेखि एक व्यक्ति एक पद भनिँदै आए पनि व्यवहारमा छैन । किसुनजीका पालामा मात्र सभापति र प्रधानमन्त्री छुट्टाछुट्टै हुनुभयो । बीपीदेखि शेरबहादुरजीको पालासम्म त्यो हुन सकेन । एउटा मात्र पद लिएर काम गर्दा देशलाई पनि फाइदा हुन्थ्यो । अब युगको सन्देश बुझ्नुपर्छ । नबुझे हामी फ्याँकिन्छौं ।
गठबन्धनको प्रधानमन्त्री संसदीय दलको नेता नभए पनि हुने उनले जिकिर गरे । पौडेलले भने, कांग्रेसभित्रै प्रधानमन्त्री बनाउने निधो भएपछि गठबन्धनमा कुरा गर्न सजिलो हुन्छ । प्रधानमन्त्रीलाई नै संसदीय दलको नेता बनाए संसदमा सजिलो हुन्छ । उनले गठबन्धन मुलुकको आवश्यकता भएको औंल्याए । पौडेलले थपे, ‘गठबन्धनकै कारण कांग्रेस पहिलो पार्टी भएको छ । म कुनै दललाई दोष दिन चाहन्नँ । नत्र २०७४ को परिस्थिति दोहोरिन सक्थ्यो ।’
यो पनि पढ्नुहोस् :
काठमाडौं— अर्थमन्त्री जनार्दन शर्माले अर्थतन्त्र नबुझेकाहरुले मात्र मुलुकको अर्थतन्त्र संकटमा छ भन्ने गरेको टिप्पणी गरेका छन् ।
बिहीबार नेपाल आर्थिक पत्रकार समाज ९सेजन० को २६ औं स्थापना दिवसको अवसरमा आयोजित कार्यक्रममा अर्थमन्त्री शर्माले अर्थतन्त्रमा केही दबाव र चुनौती रहेको तर संकटमा छ भन्न नमिल्ने बताए ।
‘अर्थतन्त्रमा प्रायः सूचकहरु सकारात्मक छन् भने कहाँ छ संकट, अर्थविद्, व्यवसायी र राजनीतिक व्यक्तित्वहरुले यहाँ चुनौती छ भनौं तर संकट छ भनेर नभन्न अग्रह छ । अर्थतन्त्रमा देखिएका समस्या र चुनौती समाधान गर्न आवश्यक कदम चाल्न सरकार र राष्ट्र बैंक खुला छलफल गर्न तयार रहेको छ’ उनले भने ।
नेपाल मिश्रित खालको अर्थतन्त्र भएकाले एकैपटक माथि पुगेर तल झर्ने अवस्था नहुने भन्दै उनले अर्थतन्त्रका सुचाङ्क सुधारउन्मुख छन् । रेमिट्यान्स, विदेशी मुद्रा सञ्चिती र पर्यटन क्षेत्रमा सुधार देखिएको अर्थमन्त्री शर्माले बताए ।
‘राजश्व संकलनमा कमी भएको छ । प्रशासनिक र खुला सीमाना व्यवस्थित गर्ने विषयमा केन्द्रित छ । अहिले बजारमा माग घटेका कुराहरु छन् । कामको गति घटेको कारण माग घटेको हो । अब विकास निर्माणका कामलाई तिब्रता दिएसँगै माग सिर्जना हुन्छ’ उनले भने ।
अर्थमन्त्री शर्माले पूर्वाधारमा लगानी बढाउन सक्दा जुम्लाबाट १२ घण्टा र चितवनबाट १ घण्टामा काठमाडौं आउनसक्ने वातारण बन्ने बताए । मन्त्री शर्माले नयाँ निर्वाचनले दलहरुलाई आफ्नो विगतको कामको समीक्षा गर्ने अवसर दिएको पनि बताए ।
यो पनि पढ्नुहोस् :
काठमाडौँ — बुधबार उच्च अदालत जनकपुरका न्यायाधीशद्वय भोजराज अधिकारी र डालकुमार खड्काको संयुक्त इजलासले नाबालक सन्तानको पालन पोषण गर्नुपर्ने संवेदनशिलतालाई विचार गरि प्रस्तुत मुद्दा किराना लगाउनुपर्ने देखिएको हुँदा अग्राधिकार दिई पेश गर्न आदेश दिएको छ।
आफूलाई जबर्जस्तीकरणी गरेको भन्दै निहारिकाले आफ्ना प्रेमि शिवराज श्रेष्ठमाथि धनुषा जिल्ला अदालतमा मुद्दा दर्ता गराएकी थिइन्। त्यतिवेला उनको बच्चा जन्मिसकेको थियो।
धनुषा जिल्ला अदालतले तत्कालीन समयमा आपसी सहमतिमै यौनसम्बन्ध स्थापित भएको देखिएको र आपसी सहमतिको यौनसम्बन्धलाई बलात्कार भन्न नमिल्ने भन्दै शिवराजलाई सफाई दिएको थियो। यससँगै अदालतले नाता कायमका लागि अर्कै कानूनी प्रक्रियामा जानसमेत सुझाएको थियो।
तर, जिल्ला अदालतको फैसलामा असन्तुष्टि जनाउँदै निहारिकाले काठमाडौंमा अनशन समेत बसी न्यायको माग गरेकी थिइन्। निहारिकाको आन्दोलन लगत्तै सरकारी वकिल कार्यालय पुनरावेदनका लागि उच्च अदालत जनकपुरमा पुगेको थियो।
निहारिकाले आफूमाथि अन्याय भएको भन्दै राष्ट्रपतिको कार्यालय अगाडि आत्मदाहको प्रयाससमेत गरेकी थिइन्। त्यसलगत्तै सरकारसँग वार्ता गरी शिवराज र निहारिकाबाट जन्म भएको बालकको डीएनए टेस्ट गराउने सहमति गरिएको थियो।
सहमति अनुसार सरकारी वकिलले उच्च अदालत जनकपुरमा शिवराज र बालकको डीएनए म्याच गराउन राष्ट्रिय विधिविज्ञान प्रयोगशाला, खुमलटारमा पठाएको थियो। उनीहरू डीएनए मिलेको थियो। त्यसको रिपोर्ट आएपछि बुधबार उच्च अदालत जनकपुरमा त्यस मुद्दामा सुनुवाइ भएको हो।
काठमाडौं महानगरपालिकाका मेयर बालेन्द्र शाहले थापाथलीको सुकुम्बासी वस्ती खाली गर्ने महानगरको कदमबारे एमाले अध्यक्ष केपी शर्मा ओलीले गरेको टिप्पणीको विरोध जनाएका छन् । उनले सुकुम्बासीहरू केपी ओलीको भोट बैंक मात्र रहेको आरोप लगाएका छन् ।
आज आयोजित एक कार्यक्रममा बोल्दै ओलीले महानगरको कदमको कडा आलोचना गरेका थिए । ओलीलाई जवाफ फर्काउने क्रममा मेयर शाहले यस्तो टिप्पणी गरेका छन् । उनले लेखेका छन्-
सम्माननीय पुर्वप्रधानमन्त्री केपी ओलीज्यू,:अधिकारसम्पन्न बागमती सभ्यताको आग्रह र समन्वयमा काठमाण्डौ महानगरले आफ्नो जिम्मेवारी पुरा गर्दै गरेको कार्यप्रति तपाईको धारणा थाहा पाएँ । तपाईबाट नै यस्तो धारणा आउनु सामान्य बिषय हो । किनभने, २०४७ यता १४ वटा आयोग गठन हुँदा पनि काठमाण्डौको सुकुम्वासी समस्या समाधान गर्न सक्नु भएन ।
मन्त्री र पटक पटक त्यो पनि दुईतिहाइको सरकारको प्रधानमन्त्रीसम्म हुनु भयो तर सुकुम्वासीले भोगेको ३२ वटा जाडो देख्नु भएन । सुकुम्वासीहरु तपाईका लागि भोट बैंक मात्रै रहे । बरु तिनलाई गुठी आन्दोलन जस्ता आफ्नो स्वार्थ विपरितका कुराहरुमा प्रयोग गर्नु भयो । त्यो पनि राजनीतिक स्वार्थवश् ।
तपाईलाई जनता, नदीनाला र नेवा सभ्यताको त्यत्रो माया भएको भए तपाईको नेतृत्वमा लुँहिटी (सुनधारा) सक्काएर सेतो टावर किन ठड्याउनु भयो ? हुनमान ढोकाको पुनर्निर्माणमा नेवा सभ्यताको मौलिकता नासेर विदेशीलाई निर्माण गर्न दिने कार्यलाई कसरी अगाडी बढाउनु भयो ? यी सबै हेर्दा नेवा सभ्यता जोगाउने, नदिक्षेत्रको अतिक्रमण रोक्ने कार्यको तपाईले बिरोध गर्नु असामान्य होइन ।तर अब परिस्थिति फेरिएको छ । यसैले सकेको सहयोग गर्नुहोला तर कसैका विरुद्धमा कसैलाई प्रयोग गर्ने कुचेष्टा नगर्नुहोला ।