हिट सिरिज ‘प्रेमगीत’ का निर्माता सन्तोष सेनले निर्माण गरेको नयाँ फिल्म ‘मेरी मामु’ आउँदो भदौ १५ गतेबाट देशव्यापी प्रदर्शनमा आउँदैछ । यसमा उनले आफ्नै ६ वर्षिय छोरा आयुव सेनलाई डेब्यु गराएका छन् । यम थापा यो फिल्मका निर्देशक हुन् ।
शुक्रवार राजधानीमा एक कार्यक्रमका बीच कलाकार र निर्माण टीमको उपस्थितिमा फिल्मको टाइटल गीत सार्वजनिक गरियो । तर, कार्यक्रममा निर्माता सेन र निर्देशक थापा फिल्मको विषयमा कम ‘नाई नभन्नु ल’ फेम्ड बाल कलाकार अनुभव रेग्मी र यसका मेकर्समाथि बढी खनिएका थिए ।
पत्रकारले निर्माता सेनमाथि सार्वजनिक गीतमा बच्चाकै स्वर किन नराखेको ? भन्दै प्रश्न गरे । उनले बलिउडको उदाहरण दिँदै भने, ‘बाल मनोविज्ञानमा बनेका बलिउडका फिल्ममा पनि बच्चाले गीत गाएको सुनेको छैन मैले । र, म बच्चाले लभ गर्दै हिँड्ने फिल्म बनाउँदिनँ ।’